यंदाचा डॉ .ना. य. डोळे स्मृती पुरस्कार सुप्रसिध्द चित्रपट निर्माते नितीन वैद्य यांना जाहिर ! उदगीर : येथील डॉ. ना. य. डोळे फाऊंडेशनच्या वतीने दरवर्षी दिला जाणारा 'डॉ. ना. य. डोळे स्मृती पुरस्कार' यावर्षी सुप्रसिध्द चित्रपट, टिव्ही मालिका निर्माते व राष्ट्र सेवा दलाचे राष्ट्रीय अध्यक्ष नितीन वैद्य (मुंबई) यांना जाहीर करण्यात आला आहे . ५ फेब्रुवारी रोजी उदगीर येथे होणाऱ्या शानदार कार्यक्रमात त्यांना आमदार कपील पाटील यांच्या उपस्थीतीत हा पुरस्कार सोहळा पार पडणार आहे. चित्रपट आणि टिव्ही मालिकांच्या माध्यमांतुन परिवर्तनवादी समाज निर्मिती साठी प्रबोधन करणे, या कार्यासाठी वैद्य यांची फाऊंडेशनच्या निवड समितीच्यावतीने निवड करण्यात आली आहे . अशी माहिती फाऊंडेशनचे सचिव अजित शिंदे यांनी शनिवारी उदगीर येथे आयोजीत पत्रकार परिषदेत दिली. डॉ. ना. य. डोळे हे उदगीर येथील महाराष्ट्र उदयगिरी महाविद्यालयाचे स्थापने पासून ३५ वर्षे प्राचार्य होते. त्यांनी उदगीर परिसरात शिक्षणासाठी येणाऱ्या हजारो गोरगरीब कष्टकरी विद्यार्थ्यांना वैचारिक वारसा दिला. डॉ. डोळे हे महाराष्ट्रातील प्रमुख समाजवादी कार्यकर्ते विचारवंत आणि राज्यशास्त्र विषयाचे प्रकांड पंडीत म्हणून ओळखले जात. १४ जानेवारी हा त्यांचा जन्म दिवस. डाॅ. ना. य. डोळे फाऊंडेशनच्या वतीने उदगीर येथे दरवर्षी 'डॉ. ना. य. डोळे स्मृती पुरस्कार' देण्यात येतो. मागील दोन वर्ष कोरोना काळामुळे पुरस्कार वितरणात खंड पडला होता. यावर्षी पुरस्काराचे मानकरी नितीन वैद्य हे ठरले आहेत. नितीन वैद्य यांनी स्टार प्रवाह या वाहिनीवरील "डॉ. बाबासाहेब आंबेडकर", आणि सोनी मराठीवरील "क्राती ज्योती" या दोन मालिंकाद्वारे फुले , आंबेडकरी विचार समाजामध्ये मोठ्या प्रमाणात रुजविला. प्रामुख्याने या कार्यासाठी वैद्य यांना यावर्षीचा डॉ. ना. य. डोळे हा पुरस्कार देण्यात येत आहे. नितीन वैद्य यांचा मुळ पिंड चळवळीचा असुन ते बालपणापासून राष्ट्र सेवादलाचे सैनिक आहेत. तसेच ते छात्रभारती या विद्यार्थी संघटनेच्या संस्थापक सदस्यांपैकी एक आहेत. महाराष्ट्रातील वेगवेगळ्या पुरोगामी, आंबेडकरी, परिवर्तनवादी व लोकशाही समाजवादी विचारांच्या चळवळींना वैचारीक बळ देण्याचे काम त्यांनी आयुष्यभर केले आहे. ते प्रतिथयश पत्रकार सुध्दा होते. दै. सकाळ, महाराष्ट्र टाईम्स, झी न्युज या सारख्या आघाडीच्या माध्यम संस्थांमध्ये त्यांनी मोलाची कामगिरी बजावली आहे. झी माध्यम समुहाच्या भाषीक वाहिन्यांच्या स्थापनेमध्ये त्यांचा प्रमुख पुढाकार राहिला आहे. त्यांच्याच नेतृत्वात झी समुहाचा विस्तार झाला. आज घडिला ते चित्रपट आणि टिव्ही मालिका निर्माते म्हणून ओळखले जातात. या सोबतच राष्ट्र सेवा दलाचे राष्ट्रीय अध्यक्ष म्हणून त्यांनी यावर्षीच जबाबादारी स्विकारली आहे. त्यापूर्वी ते राष्ट्र सेवादलाचे विश्वस्त होते. या प्रसंगी फाऊंडेशनचे विश्वस्त अजित शिंदे, दिलीप वाघमारे, अंकुश गायकवाड, बापुसाहेब कज्जेवाड , ओम गांजूरे, जशन डोळे, मोतीलाल डोईजोडे , विनायक चाकुरे आदी उपस्थित होते .