दोन घराचे कुलूप तोडून सोन्या-चांदीच्या दागिन्यांसह पावणे 14 लाखांची ऐवज लंपास उदगीर, : उदगीर ग्रामीण पोलीस ठाण्याच्या हद्दीतील निडेबन रस्त्यावर असलेल्या तुलसीधाम सोसायटीत अज्ञात चोरट्याने बंद घराचे कुलूप तोडुन सोन्या, चांदीचे दागिने व रोख रक्कम असा एकुण 13 लाख 75 हजार 600 रुपयांचा मुद्देमाल चोरून नेल्याची घटना घडली आहे. याबाबत ग्रामीण पोलीसाकडून मिळालेली अधिक माहिती अशी की, ग्रामीण पोलीस ठाणे हद्दीतील निडेबन रोडवर असलेल्या तुलसीधाम सोसायटीत शुक्रवारी (ता.14) ते शनिवारी (ता.15) च्या मध्यरात्री अज्ञात चोरट्याने सोमेश्वर राचप्पा घाडे व गोपाळ बाबुराव मनदुमले यांचे घरात कोणीही नसलेले पाहुन कुलूप तोडून आत प्रवेश करुन घरातील लोखंडी कपाटामध्ये ठेवलेले सोन्या, चांदीचे दागिने किंमत अंदाजे ९ लाख ८० हजार सहाशे रुपये व रोख रक्कम ३ लाख ९५ हजार रुपये असा एकूण असा एकूण13,75,600 रुपयाचा ऐवज कोणीतरी अज्ञात चोरट्याने चोरून नेला, याबाबत सोमेश्वर राचप्पा घाडे (68) यांच्या फिर्यादीवरून अज्ञात चोरट्यांविरुद्ध ग्रामीण पोलीस ठाण्यात घरफोडीचा गुन्हा दाखल करण्यात आला आहे. या घटनेची दखल घेऊन उपविभागीय पोलीस अधिकारी सोहेल शेख, पोलीस निरीक्षक अरविंद पवार यांनी घटनास्थळी भेट देऊन पाहणी केली असून परिसरातल्या सीसीटीव्ही पुटेज तपासणी केल्यानंतर तीन अज्ञात चोरट्यांनी हे कृत्य केलं असल्याचे प्राथमिक निरीक्षणात आढळून आले असून याचा अधिक तपास पोलीस उपनिरीक्षक तानाजी चेरले हे करीत आहेत.